انتي خابات

symboles_506984300انتي خابات،
انتي خابات
انتي صندوق و جوج ورقات

انتي سياسة و انتكاسة
و انت زردة و زرودات

انتي عليك الناس تتقاتل
و انتي فيك البلاد مشات

نص اتباع و نص ضباع
و نص يفكرفاللي فات

إيه، اتلفلك الحساب
قصة و مكتوبة فكتاب

دارو خطبة و كدبو كدبة
خلاونا برا و سدو الباب

و احنا ولاد الشعب نقولو
ربعالاف و ها حنا حباب

و انتي فيك الفلوس تدور
حط الشوا فوق الطيفور
و فيك البلاد تولي اللور
مارش آريار بلا مرايات

هاداك مهندس و طبيب
لاخر مول مؤهلات
سير آخويا كلس فالدار
ما عندك إمكانيات

خلي مول الجيب العامر
يوعدنا بعيشة الجنات
و المرشح ضحك علينا
كان فالدرب صبح ما بات

شهر واحد فخمس سنين
و ننساو من بعد اللي فات
نساو الوعود و مول الزرود
و ننساوك يا الانتخابات
انتي خابات
انتي خابات

التصنيفات: زجل
تستطيع متابعة أي ردود على هذه التدوينة من خلال RSS 2.0 feed.تستطيع أن تترك تعليق, أو Trackback من موقعك الشخصي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *